नाचता येईना अंगण वाकडे

 नाचता येईना अंगण वाकडे !

खाता येईना तोंडाचे बोळके

वासच  येईना नाक गळके

रंग दिसेनात कपडे मळके

नाचता येईना अंगण वाकडे !

चालता येईना चिखल फार 

धावता येईना, खडबडीत रस्ते 

पोहता येईना पाणी गार 

नाचता येईना अंगण वाकडे !

पाणी तापेना  गळके मडके 

भात खाववेना खूपच खडे

भाजी शिजेना ओली लाकडे 

नाचता येईना अंगण वाकडे !

वाचता येईना अक्षर छोटे 

लिहिता येईना पेन तुटके

स्पेलिंग येईना शब्दच खटके

नाचता येईना अंगण वाकडे !

गाता येईना घसाच बसला 

वाजवता येईना बोटच सुजे

साथ मिळेना तबलजी रुसे

नाचता येईना अंगण वाकडे  !

ड्रॉईंग येईना शिसेच तुटे 

पेंटिंग येईना रंगच किती फिके 

फॅशन येईना कपडे तोकडे

नाचता येईना अंगण वाकडे !

❤️💛💚

प्रोफेसर

नाचता येईना अंगण वाकडे

 नाचता येईना अंगण वाकडे.....

वधू परीक्षेला सासऱ्यांनी भावी सुनेला विचारले, तुझा छंद कोणता?

गाता, नाचता तर येत नाही, मग काय सांगावे? पटकन सुचले आणि म्हणाली *वाचन*....

अरे वाह छान, कोणते करतेस वाचन..

कोणतेही, जे मिळेल ते,

बर मग आवडीचे लेखक कोण?

अं अं.... इतक्यात नोकरीमुळे नाही जमले...

बरं बरं...

आता काय करतेस नोकरीव्यतिरिक्त?

मला झाडें लावायची आहेत, पण कुठे जागा च नाहीये....

स्वयंपाक करतेस का?

करायचा असतो पण सकाळी मी उठणायापूर्वी आई करून ठेवते आणि संध्याकाळी घरी येण्यापूर्वी कामवाली सारे करून जाते....

रविवारी?

आठवडाभर कामाने थकते,

तो तर आरामाचा दिवस.. संध्याकाळी बाहेरच जाते फिरायला... बहुधा भरपेट खाऊन च येते....

करायचे आहे खूप काही

पण वेळ च मिळत नाही...

नाचता येईना अंगण वाकडे, अन रांधता येईना ओली लाकडे असे च आहे की तुझे.... सासरे वदले..

अर्चना कुलकर्णी.

अभंग.. ज्ञानेश्वर

 सुधाकरी अभंग 🙏

निवृत्ती, ज्ञानेश

सोपान, मुक्ताई!

विठू, रखुमाई

पाही मोदे!

ज्ञानाचा सागर

केला ज्यांनी मुक्त

होती तेच भक्त

विठ्ठलाचे!

लोकांमुखी गीता

यावी ती  सांप्रत

कष्ट अविरत

ज्ञानेशाचे!

तिमिर हरोनी,

लावी दीपज्योत 

आनंद विश्वात

मागतसे!

वंदूनी गुरूला

ज्ञाना झाला तृप्त

होऊ पाहे मुक्त

समाधीस्थ!

पसायदाने देई

प्रार्थना सुखाची

विश्वाच्या मैत्रीची

ज्ञानेश्वरी!

अर्चना.कुलकर्णी

 

गुन्हा

 गुन्हा...

आई अग काय झाले तुला?

दोन महिने तुझ्या सोबत खुशीत काढले

तू माझ्याशी बोलत होतीस,

होतीस खूप आनंदलेली,

कालपासून तुला काय होतय?

डॉक्टर काही बोलले,

बाबा, आजी तुला ओरडले

तू खूप घाबरलेली

अजून ही मी मात्र गोंधळलेली

नाळ माझी तुझ्याशी जोडलेली,

जाणवतय मला तू दुखावलेली,

मी मुलगी असणे हा गुन्हा का केला?

बाबांना माझा जन्म च नकोसा झाला!

आई तू कणखर होशील?

मला जग पाहू देशील?

खेळायचे आहे मला ताई बरोबर,

बोलायचे आहे,

आहे खूप शिकायचे,

आई, तू आहेस खंबीर

तू, मी अन ताई

करू निर्माण वेगळे जग

करतील सारे कौतुक मग 

जिथे मुलगी होणे गुन्हा नसेल,

जन्मास मुलगी येणे आनंद असेल!

आई, कर ग माझी ही विनंती मान्य!

गर्भ पाडणे कर अमान्य!

सांग सार्यांना असा *गुन्हा* करणार नाही

तुझ्या सोबत मोठी होणार मी,

हे च स्वप्न माझे तू खरे करणार ना आई?

अर्चना कुलकर्णी....

अविरत

 अविरत...

रात्रीमागून दिवस

उन्हानंतर पाऊस

चक्र चाले *अविरत*

नाव  त्याचे निसर्ग!

अर्चना कुलकर्णी

संसार सुखाचा

 करू संसार सुखाचा

तिच्या न त्याच्या आवडी कधी च जुळत नाहीत

हातात हात घालून फिरायला त्याला आवडत नाही 

रस्त्याने चालताना भरभर चालणे तिला जमत नाही!

हॉटेलातले पंजाबी जेवण त्याला आवडत नाही 

अन तिथे जावून भाजी-भाकरी खाणे  तिला रुचत नाही!

मित्र मैत्रीणीना गोळा करणे त्याच्या स्वभावातच नाही 

मित्र मैत्रीणीना न भेटता तिला राहवत नाही!

सणावारी गोडधोड करण्याचा तिचा अट्टाहास,

सुट्टी म्हणून बाहेर फिरायची त्याला आस!

तिला बघायचा असतो सिनेमा, त्याला आवडे नाटक...

नाटकाचे तिकीट काढतांना  मागची सीट त्याला चालत नाही 

नाटक पाहताना सीटवरून कटकट तिला टाळता येत नाही!

 तिला स्वच्छता साफसफाई केल्याशिवाय राहवत नाही 

घरभर पसारा केल्याखेरीज त्याला चैन पडत नाही!

खरेदीला निघाल्यावर दहा दुकाने फिरणे त्याला खपत नाही 

एकाच दुकानातून  ते ही पटपट खरेदी तिला जमत नाही!

तिची होणारी घुसमट त्याला कळत नाही 

त्याचे होणारे हाल- दगदग  तिला समजत नाही!.

 वेगवेगळे स्वभाव बनवल्याखेरीज निर्मात्याला चैन पडत नाही 

आणि विरुद्ध स्वभाव एकत्र आणल्याशिवाय त्याला  मजा वाटत नाही!

तरी संसार हा दोघांचा आहे तो सुखाने  निभावल्याशिवाय ते रहात नाहीत 

आणि सुखी संसाराचे चित्र दाखवायला विसरत नाहीत .....!

अर्चना कुलकर्णी....