चैत्र गौर
आली आली ग माहेरवाशिण
ठेवा स्वागतास गुढी आणुन
अंगण सजवा शिंपून सारवून
सुबक रांगोळी काढा रेखाटून
लाडकी माझी ही गौराई
बसली झुल्यात सोन्याई
कोडकौतुका भारी घाई
स्वागताची लगबग होई
लिंबलोण तिचे उतरोनी
गौरीला देवू गं गूळपाणी
लावू अत्तर गुलाबपाणी
ओटी भरा या ग साऱ्याजणी
चैत्रागौरी पाळणा सजला
सुसंगती अक्षफेर धरला
मोगरा सुवास दरवळला
आंबेडाळ ,पन्हे नैवेद्याला
आमंत्रण गेले लेकीसुनांना
हळदीकुंकु लेकीस मान
करंजी चकली अनारसे छान
पाळण्याला दोरी रेशीमसान
पुरणाचा हा नैवेद्य आज
गौरीसवे माझीही हौस
नेसुन पैठणी, ल्याले साज
हळदीकुंकु सोहळा खास
पंचोपचारे पुजा अर्पिली
चैत्र गौर मनी भावली
मनोभावे फुले वाहिली
आखिती पर्यत विसावली
हरभरे ओले ओटीस आले
अत्तर हळुवार हाती स्पर्शले
वेणी,गुलाब केसात माळले
पाठवणी वेळी डोळे ओले
सणवारांची हौस ही मोठी
घरी सख्यांची होई दाटी
हौसेने भरली मोत्यांची ओटी
वरदाने भरो धान्याची कोठी
गौराईची करता पाठवणी
डोळे गेले पाणावूनी
येईन लवकर जाते सांगुनी
देशी आशिष मन भरुनी
