आई 2019

*१२.०५.२०१९*

*आज मातृदिन म्हणजेच मदर डे आहे…*🙏🏻

*हैप्पी मदर डे* 

*आई म्हणजे माउली…*

*आई - हृदयाची हाक*

*आई - निशब्द जाग* 

*आई - गुज अंतरीचे*

*आई - नाव परमात्म्याचे* 

*आई - ऒजळभर माया* 

*आई - दुधाची सावली* 

*आई - आभाळ माउली* 

*आई तुझी खूप आठवण येते आहे……* 

*8जुलैला तुला जाऊन दोन वर्षे होतील …*

*कित्येक दिवस तुझ्या आठवणीने घालवले आहे*

*मला माहित आहे तू सतत माझ्याबरोबर आहे ….*

 *पण तरी कुठेतरी पोरकेपण जाणवत आहे ग...*

*हो खरच मी पोरकी झाले आहे…।*

*आता मी माहेरी कोणाकडे जाऊ ग….*

*कोणाला सांगू माझी आई इथे रहाते …. मला आईकडे जा्याचे आहे …* 

*आई कुणा म्हणू मी…. माझ्या मनातील व्यथा कोणाला सांगू ग ….*

*डोळ्यात पाणी दाटले असता ….  तुझा जिव्हाळाचा हाथ नाही ग …*

*तू परत येशील का ग …. तुझ्या लेकीला कुशीत घेशील का ग*

*माझ काही चुकंल माकंल असेल तर माफ करशील का ग….*

*तू गेलीस सोडून आणि सगळंच काही बदल झाले*

*आईसाठी काय लिहू …. आईसाठी पुरतील ऐवढे शब्द नाहीत कोठे…*

*आई तू उन्हातली सावली…… आई तू पावसातील छत्री…* 

*आई तू थंडीमधील शाल… आई म्हणजे वेदने नंतरची पहिली हाक…*

*मातृदिनाच्या शुभेच्छा काय देणार…*

*एक दिवस शुभेच्छा देऊन काय होणार….*

*आईला त्याची गरज नाही असे मला वाटते …*

*आई सारखे दैवत या जगात नाही ….*

*मी आईसाठी हे केले ,ते केले सांगणारी लोक भेटतात पण आई कधी सांगत फिरत नाही मी मुलांसाठी काय केले ते*

*जाणवते आज ही तुझे प्रेम ,सर्वांना एकत्र ठेवायची धडपड*

*मुलांच्या हौशिखतर स्वतः च्या आवडीला दिलेली तिलांजली*

*चार शब्द प्रेमाचे हवे होते कायम तुला*

*वेळ मिळेल तेव्हा भेट हवी होती तुला*

*मुलांनंतर नातवाची ही झालीस आई*

*त्यांच्या करिता शिकलीस तू पिझ्झा व पास्ता ची रेसिपी तू*

*येणाऱ्या जाणाऱ्या प्रत्येकाला प्रेमाने खाऊ घालणारी तू*

*किती आठवणी येतात मनात दाटून, दुःख होते तुझी उणीव जाणवून*

आई म्हणजे सर्वस्व
आई म्हणजे मुलांचे वर्चस्व
सर्वांचे सर्व व्यवस्थित सांभाळणारी ती आई
न बोलतासुद्धा चेहऱ्यावरून सर्व जाणून घेणार ती आई
माहेरी जायची ओढ वाटावी ती आई
स्वतः कष्ट करून मुलांचे हट्ट पुरवणारी ती आई
शिक्षणाचा आग्रह धरणारी ती आई
स्वावलंबी राहा असे सांगणारी आई
खंबीर राहा,आपले आसू परक्यांसमोर ओघळू देऊ मकोस असे सांगणारी आई
कष्ट करताना लाजू नकोस ,कष्टाचे पैसे द्यायला विसरू नकोस व कोणासमोर कधी हात पसरू नकोस असे शिकवणारी आई
बाहेरची कामे करतेस म्हणून घरातल्या कामांना कमी लेखू नकोस असे सांगणारी आई
स्वयंपाक मन लावून कर असे मनावर बिंबवणारी आई
नवीन शिकायला वयाचे बंधन नाही असे सांगणारी आई
समाजाचे नीतिनियम कोणते योग्य ,कोणते कालबाह्य समजून सांगणारी ,त्याचे बंधन मानणारी आई
आज ती नाही म्हणून पोकळी वाटली तरी ती सोबत आहे असे भासणारी ती माझी आई।

अर्चना 

12।05।2019